Светската пандемија на Ковид-19 дополнително ја зголеми потребата од дигитализација на судството, истакна денеска министерот за правда Бојан Маричиќ учествувајќи на регионалната конференција „Онлајн судење за време на пандемија: Законодавство, пречки и предизвици“.
Маричиќ, како што информираат од неговиот кабинет, во својот говор се осврнал на тоа како воведувањето информатичка технологија на сите нивоа ќе влијае врз текот на судските процеси, но и на самата поврзаност меѓу судовите.
– Ние сме свесни дека е многу важно следниот период да биде воведена информатичка поврзаност на хоризонтално и вертикално ниво. Исто така, увидовме дека е потребна целосна дигитализација на случаите, доставата и интероперабилноста меѓу судовите, со цел се зголеми ефикасноста на истите, односно од една страна да се забрзаат судските процеси, а од друга да се намали потребната од физичко присуство, порача Маричиќ, информираат денеска од Министерството за правда.
Според министерот државите и без пандемијата изминатите години презема чекори кон дигитализација на судството, а пандемијата беше своевиден катализатор, односно ги забрза овие процеси. Тој се осврна и на првото онлајн судење кое се направи во судот во Кавадарци.
– Среќен сум што денес тука со нас е и судијата Лазар Нанев од Кавадарци, бидејќи токму во Основниот суд во Кавадарци се одржа првото онлајн судење, кое го сметаме како добар пример кој ќе биде дополнително охрабрување за користење современи дигитални технологии во судството, кажа Маричиќ, се вели во соопштението.