Евгениј Поп-Ацев, првиот Македонски победник на Охридскиот маратон, денеска беше примен од градоначалникот на општина Центар, Андреј Жерновски.
Од најдобриот маратонец, еден медал, како подарок за градоначалникот, а од Жерновски, честитки, поддршка и ветување дека општина Центар и тој како градоначалник, го поддржувала и натаму ќе го поддржува Поп-Ацев во неговите успеси.
Следниот голем предизвик на Поп-Ацев е октомврискиот Светски Куп во Кина и на денешниот состоанок, градоначалникот Жерновски му соопшти на маратонецот Поп-Ацев дека општината ќе ги покрие патните трошоци.
Соработката и помошта ќе биде континуирана и ќе влезе во програмата на општината за 2016-та. А, дека 26-годишниот стоматолог, по професија, а “доктор“ по маратонско пливање, Евгениј Поп-Ацев ова го заслужува говорат и фактите.
Македонскиот маратонец е прв на Гран При серијата на Светското првенство. На маратонот во Капри тој го освои второто место, а на светското првенство во пливање во Русија, беше 14-ти, што е најголем успех на Македонија досега.
Поп-Ацев плива од својата 9-та година, тренира напорно 10 до 11 пати неделно, а вели, за друго нема многу време.
На младите им порача повеќе да спортуваат, затоа што секој спорт е добар, а пливањето е еден од најдобрите.