Основниот договор за Музејот на ВМРО од 4,5 милиони евра е надграден и проширен со дополнителна серија на анекс-договори во вредност од неверојатни 10 милиони евра. Тоа е само еден пример за тоа како преку проектот „Скопје 2014“ на сомнителен начин се испумпуваат милионски суми евра народни пари, изјави денеска потпретседателот на СДСМ, Дамјан Манчевски.
– Замислете, за овој Музеј во кој главен елемент треба да бидат восочни фигури, тие не биле предвидени во основниот договор, па затоа дополнително било потребно да се потрошат уште 2,5 милиони евра со анекс на договор. Освен што не биле предвидени восочни фигури, не биле предвидени ниту основен проект, сценографски елементи, ентериер, мебел, осветлување, идеен проект и еден куп непредвидени работи во висина од околу 8,5 милиони евра. Згора на сè, потребни биле уште милион евра за довршување на објектот и уште половина милион евра за „дополнителни непредвидени работи“ – вели Манчевски.