– Граѓаните на Република Македонија имаат итна потреба од нова Влада. Претседателот Иванов веднаш да го даде мандатот на претседателот на СДСМ, Зоран Заев, бидејќи тој е клуч за излез од политичката криза во која се наоѓа државата, рече потпретседателот на СДСМ, Дамјан Манчевски.
Тој смета дека е потребен итен и мирен трансфер на власта, за институциите повторно да профункционираат и исто така потребно е што побрзо распишување на локалните избори.
Во врска со продолжувањето на мандатот на градоначалниците, Манчевски изјави дека за тоа е потребен консензус во Собранието и новата Влада ќе разговара со опозицијата за ова прашање.
На прашањето доколку Иванов не го даде мандатот на Заев, дали пратениците на СДСМ и коалицијата ќе ја изгласаат Владата, тој одговори дека унитарноста на државата никогаш не била загрозена и кога ќе дојде време за тој чекор јавноста ќе биде информирана.