Кандидатот за градоначалник на Град Скопје од коалицијата „Сојуз за иднината“, Јани Макрадули денеска им се заблагодари на граѓаните за поддршката што му ја дале во првиот круг од изборите и ги повика тоа да го сторат и во вториот круг.
– Јавно им се заблагодарувам на скопјани на целокупната поддршка, за време на кампањата и на денот на изборите, и ги повикувам да ја продолжиме нашата заедничка борба за подобро Скопје. На 7-ми април, гласањето почнува од нула. За мене гласовите на скопјани не се нешто што може да се купи, уцени, биде резултат од закани. За мене секој глас е личност, човек со желби и потреби, кој заслужува подобар, модерен град, кој заслужува подобра, слободна држава, рече Макрадули на прес-конференција.
Оцени дека гласањето во првиот круг не било фер и демократски.
– Немаше фер натпревар, ниту имаше борба на идеи, предлози и визии. Злоупотребите на јавните средства, на парите на граѓаните, задушениот медиумски простор и притисоците врз гласачите ги детектираше и мисијата на ОБСЕ/ОДИХР, рече Макрадули.
Тој додава дека столбот на неговата кампања ќе бидат граѓаните кои живеат тука, како и нивните потреби.
– Заедно со граѓаните, со поддржувачите, ќе направам се, за мојата визија за подобро Скопје да стане реалност. Моите граѓани тоа го заслужуваат, и ништо помалку од тоа не прифаќам, додаде Макрадули.