Владата на Република Македонија денеска преку соопштение, најостро протестира за насилничкиот и заканувачки вокабулар, кој го употребуваат грчките војници и кој е, се вели, својствен за некои дамнешни времиња. Ваквите чинови, се оценува, подгреваат меѓудржавна омраза.
Како што се наведува во соопштението, Владата ги презема сите дипломатски чекори за осуда на овој и ваквите слични настани во Република Грција, кои не придонесуваат за промовирање на добрососедството и духот на соработката.
– Загрижува фактот што вакви недолични и нецивилизирани појави со години се повторуваат во Република Грција, а јавноста не се сеќава да имало официјално извинување и оградување од властите. Веројатно не им пречи кога Македонци, Албанци или Турци им ги оставаат парите како туристи, а надвор од тоа пеат дека “ќе им ја цицаат крвта”, се посочува во владиното соопштение.
Воедно, се посочува дека Европската Унија ова го премолчува и толерира, а не би требало.
– Сведоци сме на прекумерни реакции за збиднувања во земјава, но редовно кога станува збор за ваков речник и настапи во Република Грција кои рефлектираат и промовираат насилнички национализам се премолчува. За доброто на европската идеја и вредностите кои таа ги промовира, неопходно е ваквите практики и брутални изблици на најрадикален национализам во државни структури да наидат на најостри осуди, стои во реакцијата на Владата.