Министрите за одбрана и за надворешни работи на Република Македонија, Зоран Јолевски и Никола Попоски денеска и утре ќе учествуваат на Самитот на НАТО алијансата што се одржува во Кардиф.
За време на Самитот, Јолевски ќе има обраќање на состанокот на министри за одбрана посветен на Платформата за интероперативност, а се предвидени и повеќе билатерални средби со негови колеги од земјите членки на Алијансата.
Министерот Попоски во рамки на Самитот, ќе учествува на сесијата посветена за ангажманот на Алијансата во Авганистан (ИСАФ формат) на ниво на шефови на делегации од сите земји членки на НАТО и земјите партнери.
На Самитот ќе биде организирана и посебна сесија на ниво на министри за надворешни работи на земјите членки на НАТО со четирите кандидати за членство – Република Македонија, Црна Гора, Босна и Херцеговина и Грузија. Во овој формат ќе се дискутира и за политиката на проширување на Алијансата.
Министерот Попоски во Кардиф ќе ги изнесе македонските видувања во поглед на одложеното членство од 2008-ма година и напорите кои се вложуваат за негова реализација, како и очекувањата од аспект на партнерскиот однос кој го имаме, по констатацијата од Меѓународниот суд за правда за прекршување на меѓународното право од една земја членка на НАТО.
Во македонската делегација во Кардиф се и началникот на Генералштабот на АРМ генерал потполковник Горанчо Котески и амбасадорот на Република Македонија во НАТО Мартин Треневски.