Утрешните предвремени избори се осми парламентарни, а вкупно 17-то изборно изјаснување во Република Македонија.
Пратениците се избираат според пропорционалниот модел во Македонија, а според мнозинскиот во дијаспората. Територијата на Република Македонија е поделена на шест изборни единици и во секоја се избираат по 20 пратеници, а тројца пратеници се избираат во дијаспората – по еден пратеник од трите изборни единици: Европа и Африка, Северна и Јужна Америка и Австралија и Азија.
Право на глас на предвремените парламентарни избори имаат 1.780.128 граѓани. По изборни единици за парламентарните избори во првата запишани во ИС се 297.686 гласачи, во ИЕ 2 306.067, во ИЕ 3 280.891, во четвртата 280.810, во ИЕ 5 286.434 и во шестата 304.458 гласачи. Најмногу пријавени за гласање во дијаспората има во ИЕ 7 (Европа и Африка) 18.911, во осмата (Северна и Јужна Америка) 3.337, додека во ИЕ 9 (Австралија и Азија) 1.534.
В недела, заедно со парламентарните ќе се одржи и вториот круг на претседателските избори.
Гласачките места на 27 април ќе бидат отворени од 7 до 19 часот. Државната изборна комисија првичните резултати од изборите ги објавува во рок од 12 часа по завршувањето на гласањето, а конечните 24 часа од денот на нивната конечност.