Потребни се акции во одредени специфично области за зачувување на одржливата имплементација, но Македонија, Албанија, Босна и Херцеговина, Црна Гора и Србија и натаму ги исполнуваат условите за визна либерализација. Тоа го покажува извештајот на Европската комисија за спроведувањето на обврските од визната либерализација за земјите од Западен Балкан и Источното партнерство.
Еврокомесарот за миграција, внатрешни работи и државјанство Димитирс Аврамополос, оцени дека тие се целосно посветени на заштита на визната либерализација за граѓаните на земјите од Западен Балкан и Источното партнерство.
– Обезбедувањето на оваа либерализација доаѓа со обврски, како за граѓаните така и за властите. Ние ги признаваме напорите на земјите за обезбедување на остварениот напредок и дека реформите даваат конкретни резултати, но сепак е потребно натамошна работа. Очекуваме сите држави да ги интензивираат напорите за справување со нерегуланата миграција и спречување на организираниот криминал и корупцијата, изјави Аврамополос.
Според извештајот сите осум земји покажуваат посветеност на исполнување на потребните обврски и преземаат важни напори за спроведување на потребните реформи и императив е овие реформи да бидат одржливи, за земјите да не назадуваат во напредокот.
Потребни се дополнителни напори, во областа на нерегуларната имиграција и реадмисијата, борбата против корупцијата и перењето пари, како и јавниот ред и безбедноста, се вели во извештајот.
Мерките спроведени за справуавње со нерегуларната миграција покажуваат резултати и ефектот е значително намалување на бројот на баратели на азил во земјите членки на ЕУ од овие земји, покажува извештајот на ЕК.
Следниот извештај на ЕК пред Европскиот Парламент и Совет за исполнувањето на визната либерализација е во 2018 година.
Македонија има визна либерализација од декември 2009 година.