Во тетовско Камењане вечерва се одржува првиот настан во рамки на јавната кампања за прогласување на Шар Планина за национален парк. Активносите од јавната кампања ги реализира Центарот за едукација и развој (ЦЕД) во соработка со Министерството за животна средина и просторно планирање (МЖСПП) и Програмата за животна средина на Обединетите нации (УНЕП).
–Кампањата ја започнуваме со „Патувачко кино“ во руралните средини на идниот национален парк на кој ќе го презентираме промотивното видео „Шар Планина – иден национален парк”. Целта е да ги промовираме природните вредности на Шара и низ неформален разговор со населението, да го запознаеме со значењето и важноста на заштитата на подрачјето. Од 20 часот во Камењане покрај презентацијата на кампањата, предвидена е проекција на промотивното видео „Шар Планина-иден национален парк“, информираат од Центарот за едукација и развој (ЦЕД).
Кампањата на терен ќе се спроведува со повеќе активности, а главна насока е запознавање и вклучување на локалното население.
-Директно вклучување, информирање и консултирање на локалното население, приватните бизниси и сите засегнати страни кои гравитираат на подрачјето на идниот национален парк Шар Планина, со цел да бидат добро информирани и запознаени што претставува национален парк, кои се придобивките, вклучувајќи ги и социо-економските аспекти и зошто Шар Планина треба час поскоро да се заштити со закон, потенцираат од ЦЕД.
Кон кампањата се приклучуваат и организациите од платформата „Пријатели на Шара” преку конкретни активности на терен и медиумска промоција.