Територијалната противпожарна единица од Кочани доцна попладнево локализираше голем полски пожар во атарот на селото Мојанци, што се закануваше да ги зафати и објектите на пречистителната станица за отпадни води.
Во четиричасовното справување со огнената стихија се вклучија шест пожарникари со две возила, поголем број волонтери од Доброволното противпожарно друштво од Кочани, како и месно население.
-Дојава за пожарот добивме околу пладне и дури по 16 часот, со натчовечки напори, успеавме да го спречиме ширењето на огнот од оризовите површини кон пречистителната станица. Во еден момент пламените јазици практично беа во кругот на станицата, а голема опасност претставуваше тоа што таму се наоѓа и резервоар со метан, што можеше да предизвика катастрофални последици. На одделни места огнот сѐ уште гори, а во гаснењето помогна и дождот што почна да паѓа доцна попладнево, истакна Владо Јефтимов, командир на одделение во ТППЕ – Кочани.
Причина за неконтролираното ширење на огнот е палењето на стрништата во нивите по завршувањето на жетвата на оризот. Поради тоа, од Противпожарната единица ги повикаа земјоделците да прекинат со неодговорното однесување за да се спречат големи материјални штети и загрозувањето на безбедноста на луѓето.
