Вчерашниот пожар кај мостот на река Лепенец, во близина на Железничка станица „Ѓорче Петров“, кој однесе човечки живот и запали штали со добиток, е брутална слика за тоа што значи хроничната негрижа на локалната власт. Она што медиумите не го наведуваат, а е познато за жителите на Општината и потврдено од очевидци, е дека овој предел покрај Лепенец е одамна познат по неконтролирано и илегално депонирање на отпад. Всушност, пожарот избувнал од дива депонија и брзо се раширил поради сувата трева!, реагираат денеска од Левица.
Од партијата со став „Единствено е непознато дали палењето на депонијата е предизвикана од човечки фактор, или пак од, меѓу другиот отпад, депонираното стакло кое во комбинација со високите температури претставува смртоносна закана. Иако проблемот со дивите депонии е хроничен и со години упорно се посочува од жителите, Стојкоски и ДПМНЕ доследно не преземаат апсолутно ништо за да го решат. Се игнорираат сите апели – од граѓаните, од Левица, од експерти и еколошки активисти, па дури ја игнорираат и сопствената предизборна програма! Се отфрлаат и советите, и иницијативите, и амандманите на советниците од Левица во Општината“.
„Токму за оваа година, советниците од Левица предложија амандман со кој се бараше пренамена на средства во Буџетот за расчистување на дивите депонии. Тој предлог беше арогантно и без аргументи одбиен од мнозинството на ДПМНЕ, со што уште еднаш покажаа дека нивните приоритети се далеку од вистинските потреби на жителите. И за парадоксот да биде поголем, во моментите кога Ѓорче Петров се давеше во густ црн чад, неподнослива миризба и вистинска опасност по здравјето и животот на граѓаните, Стојкоски и локалниот штаб на ДПМНЕ без трошка свест и совест организираа партиска трибина за „реформите во здравството“ и за тоа што нивната Влада направила во една година – како ништо да не се случува пред нивните очи. Оваа трагедија брутално ја потврди целосната нефункционалност и незаинтересираност на локалната власт на ДПМНЕ да се справи со најгорливите проблеми на жителите и да обезбеди барем основна безбедност и нормални услови за живот во Ѓорче Петров“ велат од Левица.