Со разочараност, но без изненадување, констатираме дека Мицкоски ја помина целата изборна кампања со промовирање на коалицискиот партнер ВРЕДИ и со напад врз Левица, наместо со патриотски став и поддршка на македонските кандидати во Струга, Тетово и Гостивар.
Наместо да повика на поддршка (макар и скришум), тој одбра да води кампања против Левица и да ги промовира структурите кои со години ја уценуваат државата и отворено заговараат федерализација.
Мицкоски ја водеше оваа кампања со наведната глава, следејќи ги инструкциите од коалициските пазарења и бизнис-договори склучени зад затворени врати. Додека повторуваше дека „Македонец не може да победи во Тетово, Струга и Гостивар“, тој фактички им порача на нашите сограѓани таму да се помират со понижувањето и да ја прифатат улогата на граѓани од втор ред.
Но најголемата трагедија не е неговата слабост, туку фактот што се стави во служба на структури како Биљал Касами, човек кој јавно негира македонски национални и културни симболи, кој ја стимулира етничката димензија и поделеност на локална власт и кој директно работи на разградување на унитарниот карактер на државата. Истиот тој Касами, кого Мицкоски денес го промовира – јавно говори за федерализација, етничка доминација и за политичко редизајнирање на државата. Може да се заклучи дека Мицкоски и раководството на ДПМНЕ целосно капитулирало.
За разлика од ДПМНЕ, која ја продаде сопствената политичка судбина на коалициските пазари, Левица настапи со сопствени кандидати, со сопствени сили и со чист образ. Во Струга со Јована Мојсоска, во Тетово со д-р Катка Божиновска и во Гостивар со Дарко Грујоски.
Левица понуди избор на луѓе на кои не се и нема да бидат дел од коруптивни договори, не се врзани со мафијашки структури и се спремни да работат за подеднакво достоинствени услови за живот за сите, наместо да го одржуваат владеењето на стравот, поделбите и масовното иселување.
Ние не прифативме диктат од никого – ниту од домашни олигарси, ниту од етнички партии и странски амбасади.
Македонија не е на распродажба и не завршува во Групчин. Државата не е шаховска табла за партиски игри, а општините не смеат да се мета на коалициски пазари. Македонците, Албанците, Турците, Ромите, Власите, Србите, и сите други граѓани имаат право на политика со јасни принципи, а не на политичари кои тргуваат со територии, функции и народ како со стока на пазар.
Обичниот човек во оваа земја нема ништо заедничко со трговците на власт. Маките на обичниот граѓанин се исти и тие се независни од етничката припадност. Време е некој да стави крај на нивните поделби. Заеднички ни е непријателот – политичката мафија која три децении нѐ држи заробени во поделби за да може мирно да владее и да се богати.