Бидејќи околу десет години не им биле исплаќани пари за дежурства согласно колективниот договор, над сто лекари од штипската Клиничка болница се заканија со тужба, а некои од нив веќе почнале судски постапки во Основниот суд во Штип.
Од раководството на болницата одржале состаноци со лекарите на сите одделенија, кои испратиле и официјален допис, со кој си ги бараат парите што им следуваат.
Во моментов предмет на анализа се дежурствата во изминатите три години, а според првичните проценки на лекарите од штипската Клиничка болница треба да им се исплати сума од околу 123 илјади евра.
Раководството на Клиничка болница-Штип потврдува дека до нив е пристигнато вакво барање од страна на лекарите, а како што велат секојдневно се и зголемува бројката.
– Празвиме анализа. Утврдуваме дали или не биле прекршени одредбите од колективниот договор, во однос на исплатата на дежурствата. Тогаш ќе знаеме за која сума се работи по што и ќе бараме конкретни решенија, велат од раководство на штипска Клиничка болница.