Либерално-демократската партија најостро го осудува последниот брутален напад врз сопственикот и уредник на веб-порталот Доказ.мк, Марјан Стаменковски.
„ЛДП бара од МВР веднаш да ги открие сторителите на овие срамни и подмолни напади врз новинари и медиумски работници во Р.Македонија кои ја почитуваат и практикуваат независноста и слободата на изразувањето.
Воедно, ЛДП е загрижена од трендот на насилства и пресметки со новинари и сопственици на портали кои критички ја опсервираат работата на актуелната власт. Но, веруваме дека силата на слободната мисла и независноста на новинарството е посилна од примитивизмот, насилството и бруталноста на оние кои се плашат од вистината и критиката на медиумите и јавноста.
По минатонеделните напади врз новинарот и блогер, Саше Ивановски – Политико, физичките пресметки со неистомислениците и претепувањата полека стануваат заштитен знак на залезот на десетгодишното владеење на гарнитурата, предводена од ВМРО – ДПМНЕ.
ЛДП, како организација за која личната безбедност и основното човеково право на слобода на мисла и слобода на изразување е врвен приоритет, апелира до органите на државната управа и МВР во најкус можен рок да ги пронајде сторителите на подлиот чин и да ги изведе на обвинителска клупа“, се вели во соопштението на ЛДП.
