„Целосно повлекување на аболицијата и оставка на Ѓорѓе Иванов од функцијата претседател на Република Македонија, се главните заклучоци на Централниот одбор на Либерално-демократската партија, по синоќешниот состанок на кој се анализираше актуелната политичка состојба во државата.
Масовната аболиција од 12 април, а сега и селективната аболиција, потпишана од Иванов ја втурна Република Македонија во уште потешка и подраматична политичка, економска и морална криза. Селективните аболиции на политичари се несвојствени за демократските општества и длабоко ја погазуваат правната држава и принципите на владеење на правото.
Оттаму, Централниот одбор на партијата смета дека поделбата на граѓаните, на тие за кои важи селективната правда и на оние за кои не важи правдата е недопустливо и надвор од разумот.
Централниот одбор на ЛДП дава недвосмислена и отворена поддршка на работата на Специјалното јавно обвинителство, со јасна порака, секој од отворените процеси и оние што допрва ќе следат да се процесуираат со судска разрешница. Затоа, уште еднаш апелираме до сите општествени чинители во државата и меѓународниот фактор, што поскоро да се формира и Специјален суд, што ќе овозможи и правна разрешница на политичката криза.
Затоа што владеењето на правото е клучен услов за членство на Македонија во ЕУ и во НАТО и за нормализирање на состојбата во државата.
ЛДП ги осудува заканите и притворите на граѓанските активисти и дава целосна поддршка на протестите на „Шарената револуција“, со повик за омасовување, со цел да му се стави до знаење на Никола Груевски и на фамилијата дека не можат да владеат без поддршка на граѓаните“, соопштуваат од ЛДП.