Случувањата во Битола од минатата недела, кога масовно се злоупотребија децата од неколку основни училишта во име на православната религијата, во проект насловен како “Децата за доброто и светлината“, на иницијатива на наставници, кои инаку факултативно во основните училишта го предаваат предметот “Етика на религијата“, претставува директен упад во секуларноста на државата. Одделеноста на религијата од државата е уставна категорија, како и ширење на верска нетолеранција, ксенофобија и поттикнување на нетрпеливост и омраза кон другите со поинаква конфесионална определба.
ЛДП потсетува дека религијата е лична определба, а во мултиетничко и мултирелигиозно општество какво што е нашето, фаворизирање на било која религија, преку злоупотреба на малолетни деца е крајно опасна, тенденциозна и непромислена постапка која ја заострува нетрпеливоста на религиозен, но и на етнички план.
Крајно недозволиво е најпрво, било каква религиозна активност надвор од образовните институции, каде е предвидено одвивањето на предметот Етика на религиите, кој е факултативен, а не обврзен, а потоа и фаворизирање на една религија, во овој случај православното христијанство, на сметка на другите религии, кога со Устав е загарантирана слободата на вероисповест и еднаквост на религиозната припадност. Македонија е мултиетничко и мултиконфенсионално општество и само со толеранција и меѓусебно почитување, и пред се почитување на правниот систем и Уставот на РМ, може да опстанеме како граѓанско општество.
Оттука, ЛДП бара санкционирање на организаторите на настанот, по основ на ширење на ксенофобија и нетолеранција, почитување на обврската предметот Етика на религиите да биде само факултативен, а не обврзен и да се одвива само во образовните институции, кое исто така, за жал, претставува нарушување на секуларноста на државата.
Сметаме дека ваквите активности имаат за цел поттикнување на верска нетолеранција и нивната зачестеност, како што беа и случувањата во Крива Паланка и нападот на муслиманските верници, е со цел создавање раздор и ширење на ксенофобија, како краен, но опасен одговор на процесите за нормализација на општеството кои се одвиваат со големи потешкотии, секако, со јасна цел – изградба на хомогено граѓанско, мултиетничко и мутликонфесионално општество.