Либерално – демократската партија прашува дали информацијата од општина Центар за тоа дека 2012 била година што ќе остане запаметена како година на подем и успеси во општината е првоаприлска шега, или пак погрешно пренесена вест.
За граѓаните, 2012 дефинитивно ќе остане запаметена по она што реално го видоа и почувствуваа:
– Дивеење на урбаната мафија
– Уривање на потпорен ѕид на објект на Водно, како последица на агресивните бизнис интереси
– Уништување на просторот за живеење
– Масакр на зелените површини
– Енормната загаденост на воздухот
– Безмилосно трошење на парите на граѓаните за небулозниот и мегаломански проект „Скопје 2014“.
Наместо за пералницата за пари „Скопје 2014“, локалната власт требаше парите да ги инвестира во нови училишта и градинки, во улици и велосипедски патеки, подигање на нови зелени површини, изградба и реконструкција на водоводна мрежа и атмосферска и фекална канализација.
Но, за ЛДП е особено алармантно што, според информацијата од општината и во новата 2013. милионски суми народни пари и понатаму ќе се трошат за споменици, барокни фасади и скапи огради на мостови.
Граѓаните многу добро знаат како централната и локалната власт се однесуваа кон општината Центар во изминатите 4 години, и тоа самоволие ќе знаат да го казнат на претстојните избори.