„На десет дена пред крајот на месецот, веќе никаде во аптеките не може да се најдат лекови на рецепт. Граѓаните се принудени да ја купуваат својата терапија приватно по цена која е седумкратно поголема од онаа со рецепт и субвенционирана од фондот. Оваа скандалозна ситуација е резултат на намалената квота на аптеките за 10 проценти за лековите кои одат на рецепт.
ЛДП прашува зошто е намалена квотата за лекови на рецепт на Фондот за здравство за овој месец? Дали фондот е пред банкрот, па е принуден да ја намалува квотата и да го префрли товарот директно на граѓаните? Дали одговорните во фондот се свесни дека има граѓани кои нема да можат да си дозволат потребниот лек да го купат приватно? Затоа, го повикуваме директорот на Фондот за здравствено осигурување Сашо Стефаноски јавно да се изјасни за причините за настанатата ситуација и до кога таа ќе трае.
Ниту една институција не е сопственост на партијата која е на власт, а сите одлуки кои ги носат повлекуваат последици за сите граѓани. Со тоа што овие последици може да бидат трагични за оние кои не може да го чекаат следниот месец поради неспособноста за менаџирање со институциите или уште пострашно со манипулација со истите“, се вели во соопштението на ЛДП.