ЛДП се огласи со соопштение за колумната на Миленко Неделковски, која предизвика бура реакции во јавнosта, а споменатите поднесоа и пријава лично до Јавниот обвинител.
Еве што стои во соопштението на ЛДП: Колумната под наслов “Сечење на чиревите”, која се појави на порталот во сопственост на лицето Миленко Неделковски, претставува врв на популистичкиот анимозитет и подбуцнување на јавното мислење, каде авторот, преку говорот на омраза, навредува повеќе македонски новинари и семејства на политичари од опозицијата и повикува на нивен линч.
Ова не е прв пат овој човек, што се нарекува себеси новинар, да ги навредува граѓаните и новинарите кои мислат поинаку од неговата партиска определба и да повикува на нивно институционално или вонинституционално казнување. Истакнатата листа на неподобни лица, наведени во текстот на Неделковски, е преседан кој асоцира на авторитарните и диктаторските режими, бележење на политички неподобните, метафорично ставање на жолти траки како отпадници на системот кои не смеат да имаат пристап кон ниту една институција и кои треба да бидат каменувани и линчувани од страна на прочистената раса Македонци.
Во срамниот текст на Неделковски се споменати потпредседателот на ЛДП, г-дин Нано Ружин, и неговото семејство, кои се исто така наши активни членови во форумите на партијата. Во повеќепартиските системи, разбирливо е опозицијата, новинарите и невладиниот сектор да се појават како контролори на власта и одржувањето на балансот на политичкиот систем. Неделковски со својот дрзок говор на омраза, навреди и иницирање на линч до загрозувањето на животот на граѓаните и новинарите и нивните семејства кои ги споменува именично, заслужува реакција на Јавниот обвинител, согласно одредбите на Кривичниот законик на РМ, како и на неговата политичката партија ВМРО-ДПМНЕ, чиј претседател и кандидатот за функцијата претседател на државата се чести гости во неговите ТВ-емисии.
ЛДП сака да ја искаже солидарноста со сите именувани новинари и граѓани на листата на Неделковски и воедно да потенцира дека е тоа уште еден пример на политички пристисок на власта врз граѓанските права и врз новинарите. Лицето М. Неделковски е персонификација на режимските новинари, кои во својата омраза и заслепеност го нарушуваат моралниот кредибилитет на македонското новинарство. Тој со своите постапки и текстови го разобличува и вистинското авторитарно демагошко лице на владеачката ВМРО-ДПМНЕ.