Либерално-демократската партија најостро ги осудува вчерашните инциденти во Скопје кога по фудбалскиот натпревар Вардар – Скупи, беа нападнати и претепани десетици случајни минувачи на повеќе локации низ градот.
„Упатуваме остри критики и осуда до работата и организацијата на МВР на овој спортски настан, затоа што сметаме дека на еден натпревар од ваков ризик допушта хулигани да “хараат“ низ центарот на Скопје, загрозувајќи ги животите и безбедноста на граѓаните.
Овој чин на примитивизам и вандализам на поединци е одраз на паниката на партиите на власт, кои пред закажаните вонредни парламентарни избори се обидуваат да предизвикаат меѓунационални судири и тензии, злоупотребувајќи припадници на навививачки групи.
Како политичка партија, бараме да се откријат и казнат не само насилниците во овие инциденти, туку и нивните наредбодавачи.
Политиката мора да ги тргне рацете од спортот, ваквиот облик на шовинизам не смее да се потхранува и да биде дел од нашето општество, во било каков облик.
Во спротивно, со охрабрување на девијантното однесување на навивачките групи, спортот доаѓа на второ место и сериозно назадува. Со ова се прави една од најголемите штети, а тоа е спречување на вистинските љубители на спортот да присуствуваат на големите дерби натпревари“, се вели во соопштението на ЛДП.