Никола Груевски да престане да демонстрира сила и да се заканува со нови избори, бидејќи единствено со кој може да се соочи во блиска иднина се истражните органи, а не со народот, порачуваат од Либерално-демократската партија.
Од партијата сметаат дека премиерот Груевски како креатор на кризата е главниот проблем поради кој не може да се најде решение за ситуацијата.
Во соопштението до медиумите ЛДП посочуваа дека по неуспехот на преговорите е сосема јасно дека Груевски и неговата фамилија остануваат единствената пречка за надминување на кризата и враќање на слободата и демократијата во државата.
„Тој е единствениот виновник и за назадувањето на државата во евроинтегративниот процес и евентуалното губење на препораката за почеток на преговори со ЕУ“ ,сметаат од ЛДП.
Од оваа партија остро регираат и на однесувањето на дел од европските дипломати, односно бирократи, чии ставови не коренспондираат со основните европски принципи на владеење на правото и демократијата со што се поткопуваат угледот и принципите врз кои се темели Европската Унија.
„Во таа насока, опозицијата заедно со граѓаните остануваат посветени и истрајни во својата борба за слободна и демократска Македонија, како и во барањето на оставка на Груевски и отворање на истрага против него, за сите злодела направени во изминатите 9 години, за што потврдуваат и добар дел од аудиоснимките објавени од опозицијата“ стои во соопштението.