„ЛДП ги повикува граѓаните да ја покажат човечката страна кон бегалците и мигрантите во оваа светска криза од големи размери. Денес е европски ден за поддршка на бегалците, но хуманоста ја должиме кон луѓето во неволја секој ден.
Ја изразуваме нашата поддршка и почит кон сите волонтери и невладини организации кои со месеци вложуваат надчовечки напори за помош на бегалците и мигрантите; и се вистинскиот репер за однесување, за разлика од бруталноста и примитивизмот на поединци во полицијата и војската.
Пораката што Македонија треба да ја испрати е солидарност, а не ксенофобија и оградување во реалноста и во фашистичките идеи на претставниците на власта. Помошта што ја пружаат индивидуалците е посилна од било која преплатена коруптивна реклама на владата.
Очекуваме власта во најкраток можен рок да обезбеди пристојни и соодветни услови за прифаќање и времено сместување на бегалците и мигрантите на двата гранични премини, Богородица и Табановце во пресрет на зимските месеци.
ЛДП секогаш се залага за цивилизирано решение на било кој проблем, вклучително и овој“, се вели во соопштението на ЛДП.