Либерално-демократската партија бара од Македонски Железници да ја врати редовната цена на билетите и да ги третира мигрантите и бегалците како и сите останати патници и корисници на нивните услуги.
Во исто време, апелираме до приватните автопревозници, да определат реална цена за своите услуги и да не се обидуваат да профитираат на маката на мигрантите.
Со оглед на фактот што проблемот со бегалците и мигрантите продолжува со ист интензитет, бавната и несоодветна реакција на власта, во нивно привремено згрижување и давање на прва помош, дозволува тие да се соочат со дискриминација и нехуман однос при нивниот транспорт до северната граница на државата.
Профитерскиот однос на Македонски железници, како и на некои приватни превозници надвор од Гевгелија на кои власта им овозможува „лов во матно“, е неприфатливо за едно демократско и цивилизирано општество.
Неколкукратното покачување на цената на билетите за бегалците, за да се оствари чист профит на сметка на нивните страдања за ЛДП е неприфатливо однесување, кое со оглед на сложеноста на ситуацијата добива размери на недозволиво профитерство во вонредни околности.
Целосно ја разбираме и тешката состојба во која се наоѓаат нашите граѓани од овие региони по напливот на бегалци, наспроти нискиот животен стандард на населението, но потсетуваме дека мигрантите и бегалците не се тие кои сносат вина за тоа, а виновниците за овој очај во кои сите се наоѓаме има точна адреса.