Либерално-демократската партија изразува сериозна загриженост по последниот извештај на светски реномираната организација „Хјуман Рајтс Воч“, каде е констатирано дека припадниците на Единицата за брзо распоредување употребиле прекумерна сила кон демонстрантите на 5-ти мај годинава. При тоа, “Хјуман Рајтс Воч“ напоменува државата да не го сокрие под „тепих“она што се случувало таа ноќ.
Интегрален текст од соопштението на ЛДП:
Либерално-демократската партија се придружува кон заложбите на “Хјуман Рајтс Воч“ за одговорност на сите инволвирани полициски службеници од ЕБР кои ги пречекориле своите овластувања и употребиле прекумерна сила кон насобраните граѓани, како и за нивните наредбодавачи.
ЛДП на 8-ми мај поднесе кривична пријава до Основното јавно обвинителство за бруталноста на полиција врз студентите во Градската библиотека “Браќа Миладиновци“. Во полицискиот упад во библиотеката, на телесни повреди се пожалија неколку студенти, кои се најдоа затекнати во тој момент.
Обвинителството отвори предмет за овој случај и од Либерално-демократската партија официјално побара докази за насилното однесување на полицијата. Нашата партија ги достави и аудиоснимки по што ја очекува конечната одлука на обвинителството.
Како партија, апелираме до истражните органи во државата што поскоро откривање на насилниците во ЕБР и преземање на одговорност, како јавни службеници, платени со парите на даночните обврзници, кои се задолжени да го штитат јавниот ред и мир, а не со ќотек и насилство да се изживуваат врз граѓаните.