Во светло на кулминација на политичката криза, Либерално-демократската партија одржа состанок на Извршниот одбор, во кој се анализираа настаните и се констатира дека општествената криза бара промена на системот и на свеста на граѓаните, а не само промена на власта.
Сметаме дека со целосното повлекување на аболицијата се создадоа првични услови за продолжување на преговорите со посредство на меѓународната заедница, но тие мора да бидат транспарентни и со учество на граѓанскиот сектор, како и останатите политички чинители.
ЛДП ги поддржува барањата на граѓанските организации кои настапуваат под името на “Шарената револуција“, за непречено функционирање на СЈО и отстранување на сите пречки кои им стојат на пат и доследно се залага за формирање на Специјален Суд, како начин за нивна целосна функционалност. Оставката на Ѓорѓе Иванов после вчерашното повлекување на аболицијата треба да биде само прашање на ден.
Сметаме дека правниот и политичкиот систем е така поставен што е добра основа за коруптивно и неодговорно владеење и затоа за нас системските промени се клучни, кои во иднина ќе спречат узурпација на системот од вакви размери.
Затоа, ЛДП ќе инсистира на преговарачка маса да се стави промената на изборниот модел: Македонија да биде една изборна единица, со отворени изборни листи, што означува демократизацијата на партиите и нивна суштинска реформа, но и неможност за апсолутна власт во парламентот на само една партија. Само промени кои се во интерес на граѓаните, а не на партиите, се вистински промени, соопштуваат од ЛДП.