На граѓанскиот пленум во кампот пред Влада денеска се обрати и активистот и паркобран Васко Лазаревски кој изнесе неколку причини зошто е дел од здружената коалиција „Граѓани за Македонија“.
– Овде сум затоа што сум антифашист, затоа што повеќе можам да се гледам себеси во затвор, отколку да се гледам себе си како ги буткам студентите во затвор. Овде сум затоа што се обидоа да скријат убиство на плоштад во изборната 2011 година, после изборите за кои сега знаеме како ги добија. Со насилство, поткупи и газење по човекови права победуваат на сите избори и ни ја прават земјата хаос. Ниту една институција не функционира како што треба. Се изживуваат врз студенти, средношколци, пензионери – рече тој.
Оваа Влада, додаде, која ги узурпира институциите, е најлошото нешто што и се случило на Македонија од времето на фашизмот. Тој посочи дека е дел од кампот затоа што во слободните економски зони има свет-шопови каде работниците се експлоатирани до последната капка крв.
– Такви инвестиции не ни требаат. Сакам да живеам во земја во која мал број од граѓаните ќе примаат социјална помош, а на останатите државата ќе им обезбеди услови за достоинствен живот. Сакам да им порачам на СДСМ дека првиот ден кога ќе влезат во оваа Влада ќе дојдам тука за да ги потсетам на се она што го ветија до сега – порача тој.