ВМРО-ДПМНЕ долго време, поточно 9 месеци апелираше дека е потребно итно формирање на антикорупциска комисија во Република Македонија. Денес се докажа дека ВМРО-ДПМНЕ ниту го блокираше носењето на антикорупциската комисија, ниту бегаше од нејзино формирање како што тврдеше СДСМ, изјави пратеничката Ане Лашкоска.
„Драго ни е што владејачкото мнозинство го послуша нашиот апел и беа земени во предвид нашите амандмани се со цел да се донесе што е можно поквалитетен закон за формирање на Државна комисија за спречување на корупција и судир на интереси. Како што и претходно кажавме, како опозиција нашите амандмани беа од суштинско значење кои драстично го променија текстот на законот“, рече таа.
Пратеничката додаде дека ВМРО-ДПМНЕ е задоволно што владејачкото мнозинство конечно сфатило дека на Република Македонија ѝ е потребна квалитетна и пред сè професионална антикорупциска комисија што ќе работи сериозно и без било какви политички влијанија.
„Прифаќањето на амандманите е показател дека Пратеничката група на ВМРО-ДПМНЕ нема намера да блокира вакви битни процеси туку пред се има еден сериозен пристап да дејствува за подобрување на сите процеси кои се одвиваат во нашето општество“, рече Лашкоска.