Американската администрација верува дека кинеската ракета, лансирана неделава, е прва проба на ракетен пресретнувач, што може да биде користен и за уништување на сателити во орбитата на Земјата, изјави анонимен американски воен функционер.
Кина во понеделникот во вселената лансираше ракета, но со неа во орбитата не беше однесен никаков предмет, соопшти Пентагон во средата. Ракетата се врати во атмосферата над Индискиот Океан.
Претставникот на Пентагон Моника Матуш изјави дека се регистрирани неколку предмети во текот на летот, но дека не е забележано поставување какви било објекти во орбитата или дека некои од предметите поврзани со лансирањето останале во вселената.
Големата ракета достигна висина од 10.000 километри над Земјата, што е најголема висина достигната уште од 1976 година, изјави Џонатан МекДовел, астрофизичар од Харвард-Смитсонијан центарот за астрофизика.
Кина соопшти дека ракетата е лансирана од центарот за лансирање сателити во Сичанг, во западниот дел на земјата и дека носела научна опрема за истражување на земјината магнетна сфера.
Сепак, според најновите американски разузнавачки податоци, ракетата може да биде користена во иднина за носење антисателитско оружје на такви слични патувања.
– Тоа беше проектил за кој веруваме дека претставува прва проба на еден пресретнувач што е дизајниран за гаѓање сателити кои се наоѓаат во орбитата, изјави анонимен американски воен претставник.
САД се загрижени поради кинескиот развој на антисателитски капацитети откако Кина гаѓаше со ракета еден од нејзините сателити, што престана да функционира во орбитата, во 2007 година.