СДСМ обвини дека премиерот Христијан Мицкоски се откажува од европската перспектива на државата и ја води Македонија кон изолација, оценувајќи дека Владата нема волја за спроведување на реформите неопходни за членство во Европската Унија.
На прес-конференција, портпаролката и членка на Извршниот одбор на СДСМ, Богданка Кузеска, рече дека Мицкоски со своите последни изјави потврдил дека е подготвен „со децении да чека покана“ за членство во ЕУ, наместо активно да работи на европската интеграција.
Според Кузеска, причината за таквиот пристап е стравот од европските стандарди, независното судство и одговорноста за, како што рече, злоупотребите и криминалот.
„За жал, цената за неговото заложништво ја плаќаат сите граѓани, а најмногу младите кои ќе продолжат да се иселуваат“, изјави Кузеска.
Таа оцени дека Мицкоски дошол на власт со ветувања кои не ги исполнил и дека денес, наместо реформи, бара изговори.
Од СДСМ порачаа дека европската интеграција значи подобар животен стандард, посилна економија, повеќе странски инвестиции, пристап до европскиот пазар, поквалитетно образование и користење на европските фондови.
Партијата, исто така, обвини дека Владата ја користи можноста за задолжување наместо да работи на реформите и предупреди дека во иднина може да се бараат нови изговори, вклучително и за предвремени избори.
„Народот ќе победи. Европска Македонија ќе победи“, порача Кузеска на крајот од прес-конференцијата.