Кандидатот за градоначалник од ВМРО-ДПМНЕ за општина Карпош Јагнула Куновска на вечерашниот мини митинг во населбата Карпош 4 истакна дека ќе се заложи за економски развој и изградба на православен објект во општината.
– На Карпош му е потребен православен верски објект, на Карпош му е потребна црква. Затоа јас ветувам дека со мојот тим првиот проект за кој ќе се заложиме е изградба на црква во Карпош 4, истакна таа.
Во Основното училиште Петар Поп Арсов, додаде Куновска, планираме да направиме реконструкција на надворешните спортски игралишта, како и на постоечката училишна спортска сала. – Исто така, ќе работиме и на изградба на повеќенаменски спортски игралишта кои ќе можат да се користат деноноќно и се одлична превентива од пороците на модерното живеење. Ќе ги уредиме и парковите околу зградите, а ќе изградиме и во секое од нив по едно детско игралиште, истакнаа таа.
Најави дека во соработка со Градот Скопје, ќе се работи на проектот за проширување на булеварот „Илинден“ до улицата „Никола Парапунов“, а во најкус можен рок ќе почне да се работи на постапката за расчитување на имотно-правните односи за изградба на мост преку реката Вардар.