Кандидатот на Коалицијата „За подобра Македонија“, предводена од ВМРО-ДПМНЕ Јагнула Куновска, денеска на прес-конференција пред Општинскиот изборен штаб во Тафталиџе презентираше два од 117-те проекти кои се содржани во нејзината изборна програма.
– Првиот е отворање индустриска зона Лепенец која ќе се протега по улицата Скупи во делот на автосалоните. Со овој проект ќе се овозможи влез на домашни и странски инвеститори кои се заинтересирани за изградба на производствени капацитети и отворање нови работни места. Рокот за реализација е 2014-2016 година, рече Куновска.
Вториот капитален проект за кој таа денеска информираше е гасификација на општина Карпош.
– Со вклучување на Република Македонија во проектот Јужен тек и во проектот за развој и за проширување на националната гасоводна мрежа ќе се овозможи гасификација на Карпош и пониски трошоци за енергенти. Рокот за реализација е декември 2016 година, истакна Куновска.