Симболично, на денот на ослободување на градот, 8 Октомври, во Крива Паланка денес започна изградбата на скаутски парк-иницијатива на Извиднички одред Наум Наумовски Борче, насловена „Детски спортско-рекреативен центар“ поддржана од Националниот младински совет на Македонија.
– Отпочнавме со активности за расчистување на теренот и со земјени работи, по што следува втората фаза од проектот, подигнување бетонски површини и изградба на патеки околу уредените површини. ИО „Н.Н.Борче“ е иницијатор на овој проект, насловен „Детски спортски-рекреативен центар“, кој е финансиски поддржан од националниот младински совет на Македонија во рамки на проектот „Мрдни со прст“ со грант во висина од 84.000 денари. Во рамки на целокупната иницијатива ќе бидат подигнати и зелени површини, ќе се отстранат околните мини-депонии создадени до негрижливото население и ќе бидат поставени детски реквизити и клупи, информира Игро Ангеловски, претседател на Извиднички одред „Наум Наумовски-Борче“, Крива Паланка.
Проектот се реализира во кругот на извидничкиот центар „Вавилон“ во Крива Паланка каде ќе бидат уредени две третини од дворната површина.
-Ова е една од петте програмски активности предвидени со Годишната програма за работа на одредот, со тематски наслов „Извидниците за Македонија“, додаде Ангеловски.
Информираше и дека тековно се работи и на изградбата на извиднички музеј во кој ќе бидат изложени фотографии, артефакти и документи од формирањето на одредот 1960 година, до денес.