СВР-Битола поднесе кривична пријава против 38-годишниот В.Ј. жител од селото Егри поради постоење основано сомнение дека сторил кривично дело сквернавење на умрен.
Портпаролот на СВР-Битола Магдалена Димитровска соопшти дека по преземените оперативни мерки и разговор со пријавениот констатирале дека В.Ј. ја закопал мајка си во семејниот двор.
– На 27 јануари годинава, во смејниот дом починала Даница, мајка на В.Ј.. Тој во паника дошол до идеја да ископа дупка во неговиот двор и да ја закопа. По извесен период, односно на 17 февруари В.Ј. во СВР-Битола пријавил дека неговата мајка е исчезната, изјави Димитровска.
СВР-Битола по преземените активности за пронаоѓање на Даница и расчистување на случајот, по основ на сомнение, пријавениот денеска е задржан во просториите на СВР-Битола, а за случајот се известени истражен судија и јавен обвинител со кои беше излезено на местото каде е закопана Даница.
По извршената ексхумација на телото и обдукцијата во судска медицина констатирано е дека нема елементи на насилство, односно станува збор за природна смрт, посочи Димитровска.
