Секторот за внатрешни работи – Скопје поднесе кривична пријава против 39-годишниот скопјанец А.А. поради основано сомневање дека сторил кривично дело – „неовластено производство и пуштање во промет наркотични дроги, психотропни супстанции и прекусори“. Судија на пријавениот му одреди мерка притвор во времетраење од 30 дена.
Настанот се случил во попладневните часови минатата недела, односно на 14 ноември на ул. „Топанска“ каде А.А. неовластено набавил и држел кај себе наркотична дрога хероин со намера да ја препакува во помали полиетиленски паковки и да ја пушти во продажба.
Пријавениот по претходен телефонски договор во близина на црква во населбата Скопје-Север се сретнал со непознато лице и за сума од 3.500 денари купил 5,71 грама наркотична дрога хероин спакувана во две полиетиленски паковки која ја држел кај себе.
Од страна на полициски службеници од единицата Алфа при контрола и преглед на возило „Фиат Пунто“ кај пријавениот се најдени три паковки со наркотична дрога – хероин. Тој е лишен од слобода, приведен во полициска станица каде во службен разговор го појаснил начинот на сторување на кривичното дело.
Пријавениот е познат сторител на кривични дела за што во периодот од 2000 до 2012 год. поднесени му се четири кривични пријави во врска со неовластено производство и пуштање во промет наркотични дроги, 10 пријави за тешка кражба и кражба како и една пријава за фалсификување исправа.