СВР-Скопје поднесе кривична пријава против скопјанецот Ѓ.Ф. (38) осомничен за кривично дело „разбојничка кражба“ за што од страна на судија на претходна постапка му била одредена мерка притвор во траење од 30 дена.
Со намера да стекне противправна имотна корист, пријавениот на 10 октомври околу 16.50 часот, влегол во маркетот Наја Цен ДООЕЛ на ул.„Исаја Мажовски“ и додека вработената била оддалечена од касата, одзел околу 25.000 денари по што се упатил кон излезот.
Бил забележан од вработената која тргнала кон него и вербално му се обратила да го врати тоа што го одзел, меѓутоа Ѓ.Ф. се свртил и со лименка од пиво замавнал кон неа, а потоа трчајќи го напуштил местото на настанот.
– По претходно добиена судска наредба од страна на полициските службеници од Одделението за имотни деликти и малолетничка деликвенција Карпош и Ѓорче Петров, на 11 октомври 2016 бил прегледан видеоматеријал од безбедносните камери поставени во маркетот по што осомничениот бил пронајден и приведен во ПС ОН Карпош, каде во присуство на Јавен обвинител било извршено препознавање на лице при што вработената го препознала пријавениот како сторител на кривичното дело, информира Министерството за внатрешни работи.
Во Полициската станица Карпош бил извршен разговор со Ѓ.Ф. каде тој го појаснил начинот на извршувањето на кривичното дело.
– Ѓ.Ф. е познат сторител на кривични дела против животот и телото како и кривични дела против јавниот ред, за што против него СВР Скопје до ОЈО Скопје има доставено три кривични пријави – за две кривични дела „напад врз службено лице при вршење работи на безбедноста“ и едно кривично дело „тешка телесна повреда“ од Казнениот законик на РМ, наведува МВР.