Полицијата поднесе кривична пријава против 58-годишниот жител на кичевското село Горно Строгомиште кој вчера пукаше и рани три лица во центарот на Кичево.
Кривичната пријава за А.А. (58) од с. Горно Строгомиште, е поради постоење основи на сомнение за сторени кривични дела „убиство“ и „неовластено изработување, држење и тргување со оружје и распрскувачки материи“.
Тој вчера во Кичево, со пиштол „Сиг Сауер“ калибар девет милиметри пукал кон лицата А.А. (40) од село Србјани, кичевско, Д.А. (58) од Кичево и Ш.Д. ( 54) од село Грешница, кичевско.
Повредените биле пренесени во Општата болница во Кичево, по што А.А. (40) и Д.А.(58), поради сериозноста на повредите биле пренесени во Ургентниот центар во Скопје. Повредениот Ш.А., по укажаната помош во болницата во Кичево, бил пуштен на домашно лекување.
Јавен обвинител и екипа на Полициската станица Кичево извршиле увид на местото на настанот. Притоа, пронајдени биле чаури и други предмети, кои биле подигнати и испратени на вештачење во Министерството за внатрешни работи во Скопје.