Од влезот во резиденцијалниот комплекс во Горица каде што се наоѓаат државни вили, меѓу кои и вилата “Билјана” на претседателот на државата, украдена е една од вратите. Таа е тешка неколку стотини килограми, па се претпоставува дека во нејзиното крадење учествувале повеќе лица и дека користеле и соодветна опрема.
Овој влез води кон вилата “Билјана”, резиденцијален објект на претседателот на државата, кон вилата на МВР и други вили на државната администрација. На вратата има две стражарски куќички, но тие одамна не се користат, а беа наменети за сместување на полициски чувари.
Тука имаше стражари во времињата кога во Охрид доаѓаа високи државни личности од сојузен ранг, странски делегации или кога во “Билјана” и блиските хотели се одржуваа значајни собири на државно ниво.
Инаку поратата од ковано железо е дел од историјата на Охрид. По паметење на охриѓани портата била донесена од Дедиње, Србија, за потребите на Вилата на Тито во Охрид.