Со денешната средба се отвора нова страница во натамошната соработка на двете армии за градење на доверба и не само на армиите, туку и помеѓу Македонија и Србија, оценија началникот на ГШ на АРМ, генерал-мајот Горанчо Котески и началникот на војската на Србија, генерал Љубиша Диковиќ, кој ја предводи делегацијата на војската на Србија што е во дводневна официјална посета на Република Македонија.
Билатералната воена соработка меѓу армиите на Македонија и на Србија, констатираа Котески и Диковиќ, се одвива во нагорна линија, како важен услов за развој и на добрососедските односи на двете земји.
Двајцата изразија надеж дека АРМ и војската на Србија во иднина ќе бидат фактор за стабилност во регионот.
– Со оваа средба сакаме да дадеме позитивен импулс во понатамошната соработката и на стабилноста во Регионот и пошироко, изјави по средбата началникот на ГШ на АРМ, Котески.
На средбата генерал-мајор Котески и генералот Диковиќ се договориле во рамки на продлабочување на воената соработка да користат заеднички капацитети во делот на обуката на единиците во Македонија и во Србија.
АРМ го нуди полигонот Криволак, Центарот за медицинска обука и Регионалниот центар за комуникација, додека српската војска ќе овозможи обука на специјалисти во делот на логистиката, од родот на АБХО (атомско, биолошко и хемиско оружје) во Крушевац, како и обука за одржување на воена опрема.
Разговарано е и за размена на искуства од учеството во мировните операции, Србија за меѓународни операции предводени од ОН, а Македонија за мултинационални операциа предводени од НАТО и од ЕУ.
Како што информираше Котески, договорено е и АРМ и војската на Србија, како придонесувачи во делот на формирањето на заедничките медицински-воени балкански сили, да ги здружат капацитетите за одредени прилики во регионот и пошироко.
Делегација на војската на Србија, предводена од началникот на ГШ на војската на Србија, генерал Љубиша Диковиќ, иако беше најавено, не оствари средба со министерот за одбрана Талат Џафери.