Пратеникот од СДСМ, Костадин Костадинов денеска ги повика своите колеги особено, како што посочи од ВМРО-ДПМНЕ да гласаат за одземање на мандатот на Никола Груевски, пратеник и поранешен премиер кој избега во Унгарија.
Побара од пратениците на опозициската партија да ја почитуваат одлуката на нивниот ИК одржан синоќа.
За лидерот на ВМРО-ДПМНЕ, Христијан Мицкоски рече дека не собрал храброст да ја соопшти одлуката во јавност и дека Груевски, како негов ментор го контролира.
– Исто како Груевски, и Мицкоски сака да префрла одговорност на неговите пратеници кога му е тешко да соопшти јасна одлука и став, рече Костадинов.
За одземањето на мандатот на Груевски денеска во Собранието ќе заседава Комисијата за деловничко и мандатно-имунитетни прашања.
Пратениците ќе одлучуваат по предлогот за одземање на мандатот поради неоправдано отсуство на Груевски повеќе од шест месеци, а врз основа на известувањето од претседателот на Собранието Талат Џафери, доставено на 15 мај 2019 година.
ИК на ВМРО-ДПМНЕ по синоќешната седница апелира до пратениците за мандатот на Никола Груевски да псотапат според законот и Уставот.
– Доколку се исполнети условите согласно закон и Устав за престанок на мандатот на Никола Груевски тогаш апелираме и ги охрабруваме пратениците во Собранието на РМ да постапат согласно законите и Уставот, соопшти ИК на ВМРО-ДПМНЕ.