Град Скопје распиша конкурс за избор на најеколошка компанија, за најголем придонес во областа на животната средина, најубаво уреден двор на куќа, зграда и институција и најубав состав и цртеж на тема екологија.
Конкурсот е дел од традиционалната манифестација „Денови на пролетта – Денови на екологијата“, а целта е да се промовира и популаризира грижата за животната средина и природата.
Пријавите може да се доставуваат по пошта на адресата Град Скопје-Сектор за заштита на животната средина и природата, булевар Илинден, број 82, или во архивата на Град Скопје, како и на телефонските броеви 02/3297-273 и 3297-304.
За првите две категории предвидена е по една награда во износ од по 45.000 денари, додека за категоријата најубав двор предвидени се три награди во износ од по 40.000 денари. За четвртата категорија ќе има две награди – една за ученици во основните училишта и една за ученици во средните училишта во износ од по 10.000 денари. За петтата категорија се предвидени исто така две награди, една за ученици во основните училишта и една за ученици во средните училишта во износ од по 10.000 денари.
Пристигнатите пријави ќе ги разгледува комисија формирана од претставници на градската администрација и од невладините организации.
Пријавувањето трае до 15. мај, а прогласувањето на добитниците ќе се одржи на 5. јуни.