Регулаторните тела за медиуми од регионот се уште се гледаат како да се коментатори на политичките и на медиумските случувања, а независноста на медиуми не зависи само од регулаторот, туку и од самите медиуми, е оценката на претставниците од регулаторни тела кои денеска присуствуваат на регионална конференција во Скопје.
– Еден од мотивите на нашите агенции е да им помогнеме на медиумите во што поголем степен да бидат професионални и независни, но тоа во многу зависи од медиумите. Не е доволно само регулаторот да помага, туку мора и медиумите самите да работат на тоа. Се работи за долг процес имајќи предвид каква е историјата на сите наши држави. Нема доволно развиена култура за слобода на медиумите така што мислам дека тоа е процес кој во следниот период ќе го има својот финиш, многу позитивен, вели Елвира Цековиќ од Црна Гора.
Според Марија Стојанова од Бугарија, во балканските држави перцепцијата за регулаторните тела е погрешна.
– Во балканските држави работата на регулаторите се уште се гледа како да се коментатори на политичките и медиумските случувања, а всушност нашата работа е многу поразлична. Нашата задача е да ги контролираме содржините кои медиумите ги создаваат и публиката да има можност да добива фер информација согласно новинарските стандарди, етички и морални, кои ние ги заборавивме во нашиот регион, истакнува Стојанова.
Директорот на Агенцијата на аудио и аудиовизуелни медиумски услуги Зоран Трајчевски смета дека за да се гарантира плурализмот и независноста на медиумите не е доволна само соодветна правна рамка, туку треба да се работи и да се инвестира и во човечки ресурси, особено во градењето на професионалниот капацитет на медиумските работници и во развојот на професионалните асоцијации.
Регионалната конференција е организирана по повод 20-годишнината од постоењето на Агенцијата за аудио и аудиовизуелни медиумски услуги на Македонија. На неа присуствуваат претставници од регулаторните тела на Србија, Црна Гора, Косово, Бугарија, Хрватска и Словенија. Регулаторите од Босна и Херцеговина, Грција и Албанија не присуствуваа, но, како што беше посочено, изразиле подготвеност за натамошна соработка.