Во организација на Град Скопје денеска во Музејот на македонската борба за самостојност ќе се одржи конференција на тема „Европа во мојот регион/град”.
Конференцијата е во рамки на Отворените денови–Европска недела на градови и региони 2012, чија годинашна тема е „Градовите – Движечка сила за регионален развој”.
Според агендата на собирот, ќе се дебатира за „Европската територијална соработка во Југоисточна Европа“ и „Градовите – Движечка сила за регионален развој-Иновативност, енергетска ефикасност и урбан развој“.
Во рамките на Конференцијата, за првата тема, ќе зборуваат градоначалникот на Скопје Коце Трајановски, градоначалникот на Софија Јорданка Фандакова, како и претставници од Делегацијата на Европската унија во Македонија, од Министерството за локална самоуправа и од Секторот за европски прашања при македонската Влада.