Од вагон од композицијата што сообраќала на релацијата Богородица-Табановце украдени се 52 компјутери. Кражбата во СВР Куманово вчера во 13:15 часот телефонски ја пријавиле полициски службеници од полициската станица Табановце –железнички премин.
Како што информира МВР, каржбата ја забележале српски транзитери-царински посредници кои при преглед констатирале дека недостасува пломба и оти крилото од еден контејнер било отворено.
По овластување од јавен обвинител, увид на местото на настанот извршила екипа од СВР Куманово, при што е констатирано дека според документацијата, во контејнерот требало да има 42 кутии или вкупно 1.212 компјутери, а при извршениот преглед во присуство на царински работници, утврдено е дека недостасуваат 52 компјутери без монитори марка „ХП“.
Извршени се разговори со лица затекнати на местото на настанот и засега не се знае точната локација каде била извршена тешката кражба. Се преземаат мерки за целосно расчистување на случајот.