Денеска нов обид да се деблокира работата на Комисијата за расчистување на собраниските инциденти од 24 декември.
Во Клубот на пратениците, најверојатно тимовите ќе ги засилат и премиерот Никола Груевски и претседателот на СДСМ, Зоран Заев.
Состанокот следи по вчерашната средба Груевски – Заев, на која е договорен „последен напор” за откочување на работата на Комисијата.
По вчерашната средба во Владата, немаше изјави. Во заедничкото усогласено и официјалното соопштение стои дека двајцата лидери ќе ги вложат последни напори за откочување на процесот, да се донесе конечно решение околу извештајот на Комисијата како последен обид за постигнување на договор.
„Во периодот што следува да се вложат последни напори за откочување на процесот, негово интензивирање и донесување на конечно решение околу извештајот на комисијата, како последен обид за постигнување на договор, чие евентуално недонесување ги загрозува европските перспективи на Република Македонија“,се вели во заедничкото соопштение.
Според извори на А1он, доколку не се постигне договор и не се изгласа усогласен извештај, се отвора вратата за предвремени парламентарни избори.