Дел од скопјани не го послушаа апелот од градските власти и од МПЦ и вечерва запалија коледарски огнови.
Градоначалникот на Скопје, Петре Шилегов ги повика граѓаните да се воздржат од палење коледарски огнови на отворено пред Бадник. Тој поддршка доби и од градоначалниците на сите скопски општини.
И Македонската православна црква апелираше да не се палат бадникарски огнови и на верниците им порача дека местото на празнување е во црквата.
Според индексот за квалитет на воздух на Министерството за животна средина, Скопје и вечерва се гуши. Аплиакцијата која го мери квалитетот на воздухот „Мој воздух“ регистрира дека најштетен воздух вечерва дишат жителите на Лисиче. Измерени се рекордни 537 микрограми од канцерогените ПМ 10 честички во воздухот.
Во Центар концентрацијата на овие ПМ 10 канцерогени честички е 194, во Карпош 208, во Гази Баба 221 микрограми на кубен метар… Максималната просечна дневна вредност пропишана со регулативите на Европската унија се 50 микрограми на кубен метар.
Висока е концентрацијата и на уште поситните честички ПМ 2,5. Во Центар вечерва се 102 микрограми на кубен метар, во Карпош се 198, а во останатите скопски општини нема измерено вредности за овие честички.