Комисијата за заштита на правото за слободен пристап до информации од јавен карактер му наложила на Советот на јавните обвинители да ѝ ги достави записниците од седницата за спорниот избор на јавни обвинители од 31 јануари, а кои ги побара „Транспаренси интернешнл – Македонија“. Претходно, ова тело кое го води Коле Штерјев, не ѝ ги даде записниците од седницата на невладината организација. По ова, „Транспаренси интернешнл – Македонија“ поднесе жалба до Комисијата, која се произнела позитивно и му наложила на Советот да ги предаде записниците.
Оваа граѓанска организација поднесе и претставка до Здружението на обвинителите и до Етичкиот совет. Од нив се бара да го проверат работењето, но и постапувањето на претседателот на Советот на јавните обвинители, Коле Штерјев, и на членката на Советот, Фиданка Рајевска. Ова следува кога претседателот на Советот, Коле Штерјов, гласаше при изборот на својата внука Марија Ѓоргова, но и поради тоа што Рајевска гласала при изборот на обвинителката Лидија Раичевиќ, која го гонеше сопругот на Рајевска за банкарски криминал.
Васко Маглешов