Додека на денот на дрвото надлежните се фалат со засадените дрвја, Скопје полека го губи и оној кислород кој му останува, а причинителот во голема мера се и дрвјата кои Град Скопје безмилосно ги искасапи последниве неколку години. Се чиниеше дека Градот е до толку окупиран со сечата, па дрвја се сечеа и во 3:30 часот по полноќ.
Од Град Скопје не оспоруваат дека исечените дрвја на територијата на Скопје прават да се влоши ситуацијата со загадувањето. Од таму велат дека кога ќе пораснат новите засадени дрвја, ќе имаме подобрена ситуација.
Според нив, од 2009 година Градот самоиницијативно има засадено 70 000 дрвја од кои 95% успеале. Од таму се вадат дека градот сечел тополи и стари дрвја кои биле болни и исушени, иако на терен можеше да се види дека тие дрвја беа здрави.
Тие покажуваат дека најголем дел од дрвјата се исечени поради потребите на Градот на нивно место да се појави бетон, а едно од дрвјата беше исечено и на плоштадот Македонија за новата локација на споменикот на Цар Самоил. Освен тоа, Градот исече дрвја на булеварите Партизнаски одреди, Климент Охридски, во паркот пред дом на АРМ, парковите Жена Борец и Карпошово востание, како и паркот спроти хотелот Бристол на чие место никна зградата на Агенцијата за аудио и аудиовизуелни медиуми.
Во врска со загадувањето, од Градот велат дека мерката која тие ја преземале се покажала како успешна, па дури вчера повторно се појавило загадувањето, иако спротивното се покажува преку двете онлајн страници каде може 24 часа да се следи загадувањето.
Mоментално може да се види преголемо загадување во Скопје. Во Лисиче загадувањето е за 4 пати поголемо, во Центар е 158 микрограми на метар кубен воздух, а во Гази Баба и Карпош е речиси 4 пати повисоко од дозволеното.
На официјалната страница на Министерството за животна средина моментално се гледа многу висока концентрација на ПМ 2.5 честичките во Центар и Карпош, а во останатите делови во Македонија овие честички не се мерат.
Од Град Скопје чекаат загадувањето да трае 10 дена без престан со цел повторно да прскаат со калциум-магнезиум-ацетат.
Александар Тодески