Кандидатите за градоначалници на општините Охрид, Струга, Дебрца и Вевчани денеска потпишаа Кодекс на однесување за слободни и фер избори, чин инициран од Институтот за парламентарна демократија, а во соработка со Националниот демократски институт за меѓународни односи.
Со парафирањето на кодексот, потписниците јавно се заложија за спроведување фер и демократски избори, владеење на правото, како и за коректно однесување во текот на предизборната кампања и во самиот тек на изборите.
За кандидатот за градоначалник од коалицијата „За подобра Македонија“ Никола Бакрачески, демократските и фер избори се основен белег на демократија по кој се препознаваат цивилизираните општества.
– Уште еднаш ја искажувам мојата желба за фер и демократски процес, затоа што не постои алтернатива за нас како општество кое се стреми да ги примени европските стандарди за еден мирен и демократски изборен процес, рече Бакрачески потсетувајќи дека се залага подигање на нивото на политичка свест и културна комуникација во јавните настапи.
Кандидатот за градоначалник на Охрид на коалицијата „Сојуз за иднината“ од своја страна изрази сомневање дека изборите ќе поминат во фер и демократска атмосфера.
– Мислам дека овие избори во никој случај не можат да бидат фер и демократски од причина што не е важно само денот на гласањето да помине мирно, без да има пукотници. За мене фер избори се ако и во изминатите четири години сме се однесувале фер и коректно. Не можат да бидат фер и коректни зашто сите овие четири години бев спречуван од Владата да се направи она што е потребно за Охрид, изјави Петрески.