Ги повикуваме политичките лидери да останат посветени и политичките партии се очекува да работат во насока на остварување чекори што се потребни за одржување на кредибилни избори што е можно побрзо, изјави портпаролката на Европската комисија, Маја Коцијанчич во Брисел. Таа ја потврди оценката што во име на Европската Унија и на Соединетите Американски Држави, синоќа во Скопје, ја соопшти амбасадорот на САД во Македонија, Џес Бејли, дека се уште не се исполнети условите за фер и демократски избори во Македонија на 24 април.
– Имаше развој на настани за време на викендот во БЈР Македонија. Свесни сте дека меѓународната заедница рече пред некое време дека ние ќе оцениме како се одвиваат подготовките за предвремените избори. Овие избори се предвидени со договорот од Пржино како клучен чекор во реформскиот процес што ќе ја врати довербата на граѓаните во изборниот процес, во фер натпревар на идеи и политички перспективи и да се придвижи земјата над политичката криза, рече Коцијанчич на прес-конференција во Брисел.
Според неа, постигнат прогрес во исполнување на дел од обврските од договорот од Пржино, но, сепак, таа истакна, дека тоа не е доволно за Брисел да потврди дека се исполнети условите за одржување на кредибилни избори.
– Оценката покажа дека во оваа фаза, потребните услови за организирање на кредибилни избори на 24 април во моментов не се обезбедени, иако е постигнат прогрес. Во овој контекст, ние веруваме дека сериозни напори на сите засегнати страни се потребни за да се обезбеди дека ќе бидат обезбедени погодни услови за кредибилен изборен процес, каде сите граѓани и партии слободно ќе партиципираат. Ние ги повикуваме политичките лидери да останат посветени и политичките партии се очекува да работат кон потребните чекори што се потребни за одржување на кредибилни избори што е можно побрзо, рече портпаролката Коцијанчич.
